СДСМ пред да зборува за економските политики и за тоа како се живее во државата, нека го праша Венко Филипче како живее, бидејќи тоа што го зборувз СДСМ и тоа што го прави Филипче не соодветствуваат едно со друго, реагира ВМРО-ДПМНЕ на прес-конференцијата на портпаролката на СДСМ, Богданка Кузеска.
„Нека каже Филипче како со лекарска и пратеничка плата се стига до јахти, облакодери и до акции во авиокомпании, па да ја раководиме економијата на државата во тој правец. Секако, ако е легално и законски начинот на кој ги заработил парите“, соопшти СДСМ.
Кога се зборува за економија и за животен стандард, СДСМ треба да се скрие и да молчи, се вели во соопштението.
„Од земја на раб на банкрот во времето на СДСМ, зголемени сметки, плати кои стагнираат и не се исплаќаат, за една година го сменивме начинот на живеење. Сега, граѓаните имаат повисоки плати, пензии, нови работни места, земјоделците добиваат субвенции. Разликата е јасна. Со СДСМ се крадеше, а сега со ВМРО-ДПМНЕ се градат темелите на промените“, реагираше ВМРО-ДПМНЕ.
Кузеска денеска рече дека филмските изјави на премиерот Христијан Мицкоски дека платите растат по 11, 12, 13 проценти на месечно ниво се најголемо потценување и навреда за народот.
„Мицкоски ја потценува интелигенцијата на граѓаните. Сака да им каже дека тие не знаат дека во изминати 6 месеци платите божем им пораснале за 66% или 110% за последните десет месеци? Вакви фантазии не постојат во македонската економија. Напротив. Со ВМРО-ДПМНЕ граѓаните ја живеат суровата реалност: цените растат постојано, трошоците за живот секој месец се повисоки, а платите стагнираат“, рече Кузеска.
И официјалните податоци целосно го демантираат Мицкоски, додаде таа.
– И минималната плата во Македонија е на дното на Европа и на Балканот. Во Босна и Херцеговина е 511 евра, во Србија 500 евра, во Црна Гора 600 и 800 евра. А Владата на Мицкоски не дозволува минималната плата да се зголеми на 500 евра. Наместо тоа, работниците добиваат трошки, леб и сол. Додека Мицкоски зборува за четврта економија во Европа и шеста економија во свет по инвестиции, реалноста е сосема спротивна. Македонија е четврта во Европа, но одзади, на листата на најсиромашни земји. Филмовите на Мицкоски не ја хранат сиромаштијата, не ја плаќаат потрошувачката кошница и не им носат подобар живот на граѓаните – рече Кузеска.
