СДСМ се повлекува од Комисијата за финансирање и буџет на која треба да се расправа за заемот од 260 милиони евра. Најавува и кривична пријава и интерпелација за претседателот на Собранието Африм Гаши. Кривичната пријава и интерпелацијата, како што изјави лидерот на СДСМ, Венко Филипче, е поради континуираното кршење на Деловникот и злоупотреба на функцијата.
– Ова е скандал кој не е нов и кој претседателот на Собранието веќе континуирано го спроведува, а тоа е дека, кршејќи го Деловникот, закажува состанок на Комисијата за финансирање и буџет, комисија што ја води нашата пратеничка Сања Лукаревска, и покрај тоа што таа е тука и не е отсутна, а Деловникот тоа не го дозволува. Кога пратеникот е тука, тој задолжува друг пратеник да ја води оваа комисија, рече Филипче.
Ваквото однесување на собранискиот спикер, според СДСМ, станува пракса и претставува директно прекршување на собраниските процедури и правила.
Ваквиот чекор на СДСМ следува откако вчера пратеничката група на ВМРО-ДПМНЕ побара од претседателот на Собранието да ги искористи можностите што му ги нуди Деловникот за да закаже седница на Комисијата за финансирање и буџет на која треба да се расправа за заемот од 260 милиони евра. Во Собранието во тек е седницата на Комисијата за финансирање со која претседава Бојан Стојановски од ВМРО- ДПМНЕ.
