ВМРО-ДПМНЕ преку соопштение обвини дека СДСМ, Левица и ДУИ го блокираат донесувањето на новиот Изборен законик и, според партијата, наместо реформи, се одлучиле за политичка блокада.
Од владејачката партија велат дека претставниците на трите партии со месеци учествувале во разговорите и усогласувањето на законското решение, но се повлекле во моментот кога требало да биде постигнат конечен договор.
„По четири месеци преговори за Изборниот законик, Венко Филипче одеднаш оцени дека се потребни експерти и најде нов изговор за да не се постигне договор“, наведуваат од ВМРО-ДПМНЕ.
Според партијата, блокирањето на Изборниот законик е заеднички потег на СДСМ, Левица и ДУИ, а причината, како што тврдат, е стравот од изборен пораз.
Од ВМРО-ДПМНЕ посочуваат дека остануваат подготвени веднаш да прифатат договор меѓу опозициските партии доколку тоа овозможи да се олесни гласањето на дијаспората.
Во соопштението додаваат дека доколку државата продолжи да функционира со постојниот Изборен законик, одговорноста, според нив, ќе ја сносат СДСМ, Левица и ДУИ.
