Собранието денес ќе ја одржи 112. седница, на која централна точка ќе биде реконструкцијата на Владата. Пратениците ќе расправаат за предлозите за разрешување на неколку министри и заменици-министри, како и за избор на нивните наследници.
Од функцијата министер за правда треба да биде разрешен Игор Филков, а за негов наследник е предложен Јетон Шасивари.
Кадровски промени се предлагаат и во Министерството за односи меѓу заедниците, каде Иван Стоилковиќ треба да биде разрешен, по што е предвидено да ја преземе функцијата министер за локална самоуправа. Од таа позиција, пак, ќе биде разрешен Златко Перински, кој се очекува да застане на чело на Фондот за здравствено осигурување.
За нов министер за здравство е предложен Сашо Клековски, кој треба да го наследи Азир Алиу, додека Агон Ферати е кандидат за министер за односи меѓу заедниците.
Промени се предвидени и во Министерството за земјоделство, шумарство и водостопанство, каде Цветан Трипуновски треба да биде заменет со Борче Серафимовски. Во Министерството за социјална политика, демографија и млади, наместо Фатмир Лимани, е предложен Ѓоко Велковски.
Во ресорот култура и туризам се предлага Зоран Љутков да биде разрешен, а функцијата да ја преземе Седат Сулејмани. За министер без ресор, наместо Шабан Салиу, е предложен Ерџан Демир.
Се очекува премиерот Мицкоски пред пратениците да ги образложи причините за реконструкцијата, која беше најавувана во изминатиот период.
Согласно собранискиот Деловник, по секој предлог за разрешување се отвора расправа, која може да трае најмногу два дена, а министрите за кои е поднесен предлог за разрешување имаат право на обраќање во траење до 15 минути. За избор на новите министри е потребно мнозинство гласови од вкупниот број пратеници.
