Протестите и блокадите пред институциите во државата утре ќе продолжат пред Стопанската комора на Македонија во центарот на Скопје. Како што беше најавено денеска на прес конференција во Сојузот на синдикати на Македонија, протестот ќе почне на пладне, во 12 часот пред крстосницата кај Стопанската комора.
„Повторно ќе бидеме 21 претставник на синдикатот, колку што е потребно согласно законскиот минимум за да излеземе на улица и да блокираме“, рече претседатлеот на ССМ Слободан Трендафилов, додавајќи дека нема да дозволат работниците да мрзнат.
Тој додаде дека блокирањето овој пат е наменето за газдите кои ги блокираат работниците 36 години и кои „одбија до крајот на минатата година да ги зголемат работничките плати и да ја зголемат минималната плата, а кукаат дека квалификуваните работници заминуваат од Македонија и дека не можат да ги задржат“.
Вчера, неколку часа беше блокиран пристапот до Собранието, каде што синдикалците ги оневозможија пратениците да дојдат со автомобили до своите работни места.
Стопанската комора е следната дестинација, а наредната недела ќе биде блокарана и Владата.
Причина за блокадите се неисполнетите барања на синдикатите за зголемување на минималната плата на 600 евра и за зголемување на другите плати за 6.000 денари.
Трендафилов реагираше и на јавните прозивки за наводно малиот одзив на блокадата вчера пред Собранието, велејќи дека овие блокади се таргетирани и наменски се со 21 човек, само за да се покаже дека не се потребни 12 илјади кои излегоа на 28 јануари.
Сепак, Трендафилов ги повика работниците кои можат и кои ќе поминуваат, да се придружат макар и на пет минути на протестот, затоа што како што рече, „другите не бројат“.
Тој додаде дека по завршување на блокадите Синдикатот ќе повика на голем работнички протест за кој ќе биде организиран превоз од сите градови и ќе им се даде шанса на сите работници да учествуваат на протест кој ќе биде организиран во неработен ден.
„Да излеземе многу повеќе од 21 човек на улица пред да го организираме генералниот штрајк во јавниот и во приватниот сектор, доколку и понатаму продолжат со игнорантскиот однос“, рече Трендафилов.
