Претседателката Гордана Сиљановска-Давкова упати честитка до верниците од православна вероисповед по повод државниот празник Свети Климент Охридски.
„Денес, на 8 Декември, го чествуваме Свети Климент Охридски – нашиот најголем просветител и најверен ученик на светите браќа Кирил и Методиј“, порача претседателката.
Таа истакна дека споменот за охридскиот светител е длабоко врежан не само во македонската, туку и во заедничката меморија на целиот словенски свет.
Како што неговиот лик ги украсува храмовите, така името на Свети Климент го носат бројни образовни, научни и културни институции во државата. Но, највредното наследство што го оставил – нагласи Сиљановска-Давкова – е писменоста и моралните вредности, кои им овозможиле на луѓето подобро да ги разберат книгите, самите себе, но и својата улога во заедницата.
„Под негово водство, нашите краишта од политичка периферија прераснале во образовен, просветен и културен центар со древниот Охрид како духовна престолнина“, стои во честитката.
Охридската книжевна школа и богатото духовно и уметничко наследство, според неа, оставиле печат врз европската цивилизација, траејќи подолго од империи и идеологии.
Празникот, како што подвлече претседателката, е и повод за преиспитување:
Колку од светиклиментовите вредности – милост, смирение, помош и разбирање – ги живееме денес?
„Пред нас стои голем предизвик: повторно да ги научиме доблестите што ја одржуваат заедницата. Како и во времето на Климент, и нам ни е потребна заедничка, повисока цел што ќе нè обедини“, истакна Сиљановска-Давкова.
Таа повика на градење односи засновани врз владеење на правото, борба против корупцијата, социјална правда и заемна грижа – како предуслови за обновување на општествениот договор.
„Нека пораката на Свети Климент – за смирение, милост, знаење и заедништво – ни биде водилка да ја изградиме Македонија како пристојно, праведно и достоинствено место за живеење.
Честит празник!“
