Сопственичката на авто сервисот во Пинтија во кој беше подметнат пожар утрово на Фејсбук сподели дека собираат донации за да можат што поскоро да ги исплатат штетите на нивните клиенти.
„Нашиот сервис беше зафатен од пожар, предизвикан со намерно палење на возилата на нашите муштерии, паркирани на плацот. За неколку минути, над 30 години труд, посветеност и работа исчезнаа во пламен. Штетата е огромна – и материјална, и емотивна. Иако фирмата е осигурана, процедурата е долга и неизвесна. А дури и со откривање на сторителот, целосна надокнада е речиси невозможна“, посочи во својата објава, Биљана Спасовска Гаревска.
Таа исто така истакна дека иако немале законска обврска за штетата на возилата на клиентите, сепак тие како луѓе чувствувале морална одговорност и вели дека затоа им е потребна помош.
