Италијанските медиуми, меѓу првите „Кориере дела Сера“, донесоа неверојатни вести – 12 поранешни и актуелни фудбалери од Серија А се под истрага за нелегално обложување.
Државниот суд во Милано почна процес врз основа на податоци од мобилниот телефон на Сандро Тонали, играч на Њукасл и Никола Фаџоли, играч на Фиорентина, кои беа запленети во октомври 2023 година.
Споменатите играчи веќе беа суспендирани поради слични прекршоци, со тоа што овој пат во приказната се појавуваат нови актери и детали. „Газета“ истакнува дека никој од овие играчи не е под истрага поради сомнеж дека местеле натпревари или се обложувале на натпревари на кои играле.
Она што го правеле било обложување на други спортови, но на нелегални платформи, а покрај тоа играле и онлајн покер.
„Во истрагата се запленети 1,5 милиони евра и испитани се 12 играчи од Серија А, затоа што вложувале пари кај двајца водители на нелегални обложувачки платформи – Томасо де Џакомо и Патрик Фицери. Сето тоа одело преку тројца вработени во златарница во Милано. Таа служела како банка за прикривање“, известуваат Италијаните.
