Полициски службеници од СВР Куманово денеска ги лишиле од слобода 22-годишната А.С.Д. и 34-годишната М.В., двете од Куманово, поради сомнение дека со злоупотреба на лични податоци земале брзи потрошувачки кредити во име на 19 лица и се стекнале со противправна имотна корист од 10.820.000 денари.
Од Министерството за внатрешни работи соопштија дека против А.С.Д. е поднесена кривична пријава за кривичните дела „измама“ и „злоупотреба на лични податоци“, додека против М.В. е поднесена пријава за „помагање“.
Според истрагата, првоосомничената во периодот од јануари до јули годинава, со однапред подготвен план и со намера да прибави противправна имотна корист за себе и за второосомничената, во 19 наврати ги довела во заблуда оштетените лица.
Без нивна согласност и овластување, таа ги користела нивните лични податоци за да аплицира за брзи потрошувачки кредити. По одобрувањето и исплатата на средствата, парите биле противправно присвојувани од двете осомничени.
Според МВР, второосомничената постапувала по претходен договор и ѝ помагала на првоосомничената во реализацијата на измамата, преземајќи дејствија што овозможиле успешно извршување на кривичните дела.
