За да не ни се повтори искуството од минатото за препораките на ОДИХР да ни ги враќаат по секој изборен циклус, односно едно да влегува во Собрание, а конечниот резултат да ни е друг, овој пат сакаме да направиме широки консултации, рече министерот за правда Игор Филков за предлог измените на Изборниот законик на денешната прес-конференција на која информираше за реформската агенда и подготвените предлог-закони од страна на Министерството за правда во изминатите десет месеци.
На новинарско прашање поврзано со препораките на Мисијата на ОБСЕ/ОДИХР кои се однесуваат на измени во Изборниот законик најмалку шест месеци пред одржување на изборите, Филков изрази надеж дека во наредните две недели политичките чинители ќе имаат волја и расположение да седнат на маса.
– Мислам дека има време во наредните две недели да седнеме доколку има расположение и политичка волја од страна на сите политички чинители. Можам да говорам во мојот дел како министер за правда и во дел на политичката партија која ја претставувам, рече Филков.
Прашан дали ќе бидат опфатени предлозите за измени во Изборниот законик на работната група предводена од Александар Новаковски од минатите избори, Филков рече „работната група ќе биде оптимизирана со време, ние се водиме по препораките на ОДИХР кои што ни се најбитни“.
Филков беше прашан и за тоа дали Министерството за правда ќе ја чека одлуката на Уставен за оценка на уставноста на одредбата од еден отсто од запишаните избирачи за кандидатура на независни советници и градоначалници или ќе се интервенира во Изборниот законик конкретно за таа одредба, за што тој кусо одговори дека ќе се чека одлуката на Уставен.
За тоа дали со измените е опфатена промена за земјава да стане една изборна единица, министерот рече дека досега тоа не било предмет на разговори.
Филков, исто така, беше прашан за коментар по средбата на работната група за реформи во правосудството, откако претходно бараше Социјалдемократите да предложат нови членови на местата од Ана Чупеска и Ана Михајлова Стратилати, за што рече дека средбата поминала добро, во работна атмосфера.
– Работната средба помина добро во работна атмосфера. Морам да признам една од пократките средби кои што во животот сум ги имал каде што од моја страна беа информирани за работите и работните процеси до каде се и каде тие би можеле да дадат свој придонес, а за тоа што претседателот на СДСМ не ги повлече говори за нивните капацитети, изјави Филков.
