Опозициската СДСМ денеска соопшти дека фирма со само тројца вработени за два месеци добила тендери од Владата од 74 милиони денари или 1,2 милиони евра.
„Овие факти отвораат сериозни сомнежи за нетранспарентни постапки, фаворизирање и коруптивни тендерски шеми како во досегашните објавени бомби“, рече портпаролката на партијата Богданка Кузеска.
Според податоците на партијата, фирмата „Сигмоид гроуп“ од Скопје била формирана пред две години и тендерите за ИТ опрема ги добила од Генералниот секретаријат на Владата и од СОЗР.
„Првиот договор склучен на 13 октомври 2025 со Министерството за финансии, , е вреден околу 60.000 евра. Само после два дена, има нов договор, склучен на 15.10.2025, со Генералниот секретаријат на вреден речиси милион евра (980 илјади евра).
И шест недели подоцна, на 01.12.2025, нов државен тендер, овојпат за софтвер за следење на работни процеси во СОЗР, вреден околу 76 илјади евра“, рече Кузеска.
Таа постави прашање дали „причината за добивањето на овие тендери била близината на сопственикот на фримата, извесен Ј. Јанкуловски, кој дипломирал на Машинскиот факултет, токму на насоката мехатроника и роботика, каде што Христијан Мицкоски е професор?“
Од Владата ги отфрлија ваквите наводи велејќи дека тие се целосно неосновани, неточни и претставуваат груба клевета и свесна конструкција.
„Станува збор за централизирана јавна набавка за 20 министерства со одлука на Владата. Набавката на овие системи има за цел да ја зајакне сајбер – безбедноста на институциите преку навремена идентификација на безбедносни слабости и проактивна заштита од закани.
Во текот на постапката имаше две понуди, а наведениот субјект имаше најповолна понуда. Постапката беше спроведена без никаква забелешка, ниту пак покрената жалба.
Во однос на другата спомената јавна набавка, станува збор за реално потребен софтвер за проект кој го ветивме пред граѓаните со цел зголемена транспарентност и дигитализација на институционалните процеси, односно предвидува модул за следење на договорите (нивна исполнетост и количина), модул човечки ресурси, модул увид за барања од разни институции до СОЗР, прегледност на режиски трошоци и која институција колку троши“.
Од владата додаваат дека наводите поврзани со поединци и наводни привилегии се апсолутно неточни и се во директна спротивност со фактите и достапната документација од надлежните институции. „Јавно и одговорно тврдиме дека во сите постапки не постои ниту најмал пропуст, ниту најмала неправилност“.
Со реакција се јави и ВМРО-ДПМНЕ, од каде рекоа дека фирмата „Сигмоид“ не постои две години, туку многу повеќе само го сменила името од ДОО во ДООЕЛ, а во 2019 година добила грант од ФИТР од над 1,4 милиони денари. Потоа добивала и други тендери од АЕК од 700 илјади денари, како и од Агенцијата за пошти и ДЗР.
