Хрватска по 16 години повторно го враќа задолжителниот воен рок. Парламентот со 84 гласа „за“ го усвои законот кој ќе важи од следната година, а новиот модел е далеку поразличен од старото служење војска — пократок, подобро платен, но и контроверзен.
Секој 19-годишен маж ќе мора да помине два месеци во касарна во Книн, Слуњ или Пожега, за што ќе добие плата од 1.100 евра месечно, а времето ќе му се смета како работен стаж.
Најголемата предност доаѓа по завршувањето на службата: регрутите ќе имаат приоритет при вработување во државна и локална администрација — што опозицијата го нарече „милитаризација на јавниот сектор“.
Оние што ќе одбијат да носат оружје ќе можат да служат цивилен рок, но три до четири месеци за помала плата и без државни бенефиции.
Министерот за одбрана Иван Анушиќ изјави дека програмата ќе чини околу 23,7 милиони евра годишно, и дека Хрватска „мора да биде подготвена за секое сценарио“.
