Цените во маркетите рушат рекорди. Телевизија 21 беше во обиколка на неколку поголеми ланци на маркети. Регистриравме повисоки цени минимум за 10 до 20% на месо, млеко, сирење, кашкавал, јајца, ориз, кафе во однос на минатата недела, кога завршија владините мерки за замрзнати маржи и цени. Поскапени се и средствата за хигиена, овошјето. Најдовме и цреши за 1.359 денари за килограм, лубеница 219 денари за килограм. Бананите и јаболката отидоа до 100 денари, лимонот 150.
Од Сојузот на синдикатите на Македонија, велат ова е неиздржливо. Кошничката со нивните 63 основни продукти, само оваа недела е повисока за 1.000 денари.
„Вредноста на синдикалната минимална кошница, после неколку денови од истекот на мерката е зголемена некаде околу 1.000 денари, што ни зборува дека доколку овие 63 основни прехрамбени производи за само неколку денови имаат промена на цените, зборуваме за промена на цените помеѓу 20,30, 50 и 70 денари, што останува за сите други производи“, рече Слободан Трендафилов.
„Цело време континуирано зборуваме дека трговците не се фер и го изигруваат секој момент кога нема мерки на сила за да ги потрошат и така ниските работнички плати.“, изјави Трендафилов.
Владата ќе реагира ако цените се покачат. Но тоа мора да го утврди Државниот пазарен инспекторат. Министерот за економија Бесар Дурмиши вчера се закани со поригорозни мерки ако трговците ги зголемат цените.
Според него горната граница на поскапување би била меѓу 15 и 20 проценти за да се реагира.
„Ако оди покачување на цената да речеме 10 проценти, 15, 20 проценти покачување на цената на одредени производи и ако ова се утврди од Државен пазарен инспекторат, значи во писмена форма не известуваат, ние имаме сектор внатре што прави анализи врз податоците што ги зема од ДПИ и врз основа на тие анализи и врз основа на тие податоци ќе донесеме, пак кажувам поригорозни мерки“, вели Дурмиши.
