За да бидете член на надзорниот одбор на акционерското друштво „М-НАВ“, треба да имате најмалку 240 кредити, односно да имате завршено 4-годишно високо образование. Но, тоа не важи за Милорад Милановиќ, кој веќе шест месеци е избран за член на надзорниот одбор и тоа само со средно образование пренесува Алсат.
И според неофицијални информации, тој го завршил средното образование во Црна Гора, а неговата диплома не е нострифицирана. Милановиќ е вработен и во М-НАВ, што значи дека со неговото назначување за член на надзорен одбор се прекршуваат членовите 72 и 73 од Законот за спречување на корупција и судир на интереси. Парадоксално е што Милановиќ треба да ја надгледува и оценува сопствената работа како вработен во М-НАВ.
Милановиќ како член на надзорниот одбор попречува различни процедури за потребите и развојот на М-НАВ. Конкретен пример е попречувањето и неодобрувањето на тендерот за обезбедување на објектите на М-НАВ, откако пред 5 месеци заврши претходниот договор потпишан со компанијата 2СС. Овој договор е вреден над 50 илјади евра, па затоа е потребно одобрение и од надзорниот одбор. Како што неофицијално дознава Алсат, овие пречки се прават со цел Управниот одбор да се прикаже како ненадлежен пред Владата, бидејќи Владата има иницијатива М-НАВ да ја води само еден генерален директор, а не сегашните тројца. Во моментов, М-НАВ е предводена од директори од три сектори. Сектор за контрола на летање, сектор за навигација и финансиски сектор.
Милановиќ не е првпат да биде избран за член на надзорниот одбор. На оваа функција беше и пред да дојде СДСМ на власт. Потоа, во декември 2017 година беше разрешен со одлука на тогашниот вицепремиер Оливер Спасовски. Милановиќ беше дел и од „бомбите“ што ги објави тогашниот опозициски лидер Зоран Заев, за кој се слуша како раскажува како ВМРО ги разрешува непотребните и оние кои не мислат подеднакво.
Надзорниот одбор на М-НАВ го сочинуваат тројца членови, Милорад Милановиќ, Горан Јандреоски и Ријад Алими.
Извор: Алсат
