Јас сум единствен легален учесник во сообраќајот во таа несреќа. Вака пратеникот од Левица, Сашко Јанчев го прокоментира поднесувањето обвинение од страна на ОЈО против него за сообраќајката во Марино во која загина 16-годишниот Матеј Димовски.
Јанчев тврди дека случајот се користи за политичка пресметка, а демантираше и дека шпекулациите оти бил под дејство на алкохол или дрога.
-Најпрво жал ми е за се што се случи таа вечер. Не поминува ден да не помислам на ова. Веднаш после настанот пружив помош и повикав помош. Направив се што можеше да се направи. Морам да забележам дека брза помош чекавме цели 50 минути. Морам да забележам и дека јас сум единствен легален учесник во сообраќајот во таа несреќа. Исто така морам да забележам и дека власта уште истиот ден, само после неколку часа, почна да го користи случајов за политичка пресметка со мене преку координирани и планирани напади.
Уште рано наутро преку нивните пропагандни медиуми пуштија вести дека сум бил пијан, дрогиран и дека сум возел бесно. Ништо од ова не е точно. Пуштија вест дека сум возел бесен џип и ставаа слики од нови скапи возила. И ова не е точно. Моето возило е старо 20 години, вели Јанчев.
Неговата реакција доаѓа само неколку часа откако Основното јавно обвинителство Скопје поднесе обвинение против него за „Тешки дела против безбедноста на луѓето и имотот во сообраќајот“.
Иако Обвинителството во истрагата констатираше дека Јанчев направил непрописно свртување со својот „Хјундаи тусон“ без да се увери во безбедноста, во самиот акт се потврдуваат и наводите на Јанчев за другата страна – моторот „Јијинг“ во кој удрил бил без регистарски таблички и без вградени светла, а починатиот 16-годишник и неговата сопатничка не носеле кациги и немале возачка дозвола. Сепак,
ОЈО смета дека примарната вина за загрозување на сообраќајот е кај возачот на автомобилот.
