Основниот суд во Свети Николе изрече едногодишна затворска казна за 21-годишен маж од селото Сарамзалино, кој брутално ја претепал својата бремена партнерка и противправно ја држел затворена во соба со часови.
Според судската пресуда, насилството се случило во семејниот дом, кога обвинетиот ѝ го одзел телефонот и клучевите од автомобилот и ја заклучил во просторија каде што ја држел околу 15 часа. Во текот на нападот ѝ нанел повеќе телесни повреди.
Во еден момент, кога жената се онесвестила, напаѓачот ја разбудил со студена вода, по што продолжил со физичкото малтретирање.
Судот го прогласил обвинетиот за виновен за кривичните дела телесна повреда и противправно лишување од слобода и му изрекол единствена казна затвор во траење од една година.
Од Основен суд Свети Николе информираат дека пресудата сѐ уште не е правосилна, а обвинетиот останува во притвор до нејзиното конечнo потврдување, но не подолго од 60 дена.
Во меѓувреме, Основно јавно обвинителство Свети Николе соопшти дека поднело жалба на висината на изречената казна, оценувајќи дека санкцијата не соодветствува на тежината на делото.
