Алармантни податоци за состојбата со ракот на грло на матка во земјава. Само минатата година биле дијагностицирани сто дваесет и две жени со ова малигно заболување.
Според податоците, во Македонија најмладата пациентка која била дијагностицирана со оваа болест имала само 18 години.
„Уште посериозен здравствен проблем станува што прилично висок процент – од 70 до 80 проценти од овие пациентки се јавуваат во локално напредната болест односно во еден значајно екстензивен процес на болеста кога е најинтензивен и третманот“, вели проф. д-р Виолета Клисаровска од Универзитетската клиника за радиотерапија и онкологија во Скопје.
Лекарите велат дека најдобриот начин за превенција е вакцинацијата со вакцината против ХПВ-вирусот.
Последните податоци покажуваат дека бројот на вакцинирани расте во споредба со претходните години, но опфатот се уште не е доволно висок.
Покрај вакцинацијата, лекарите велат дека мора да се направат и промени во скринингот – воведување на ХПВ-тестот кој попрецизно ќе ја открива болеста.
„Мораме да преоѓаме на нови методи. Новата метода која што е во скринингот и која според СЗО треба да ја применуваме веќе сите земји од 2030-та година е ХПВ тестот како примарно средство за скенирање на ракот на грлото на матката бидејќи е поточно, посензитивно и повеќе штеди пари“, изјави проф. Д-р Горан Димитров, Претседател на Македонското здружение за цервикална патологија
„Комисијата за превенција од цервикален крацином изготви упатство во кое ние даваме предлог како гинеколози, но вклучително и патолог, онколог и епидемиолог кој е најдобриот начин за конечно ХПВ базираниот скрининг да стане примарно помагало за откривање на овој превентабилен карцином“, вели проф. д-р Ирена Алексиоска Папестиев – Претседателка на Комисија за превенција од цервикален карцином.
„Апсолутно како цитопатолог ја поддржувам идејата ХПВ скринингот да биде примарен скрининг со оглед на тоа што не секогаш ние на ПАП тестот можеме да ги откриеме промените“, изјави д-р Верди Станојевиќ, раководител на Цитолошката лабораторија во ГАК.
Ракот на грлото на матка е еден од карциномите кој може да се превенира. Во Македонија е се уште меѓу најчестите малигни болести.
