Палестинското движење Хамас во Газа ослободи осум заложници и ги предадоа на Црвениот крст, но размената беше проследена со хаотични сцени пред насобраните палестински граѓани.
Во замена, Израел треба да ослободи 110 палестински затвореници.
Прва беше ослободена 20-годишната израелска војничка Агaм Бергер, во бегалскиот камп Џабалија во Северна Газа. Потоа следеше предавањето на уште двајца израелски граѓани – Арбел Јехуд (29) и Гади Мозес (80), како и на петмина тајландски работници, кои беа киднапирани на 7 октомври 2023 година за време на нападот на Хамас врз Израел.
Особено внимание привлече ослободувањето на Јехуд во Хан Јунис, каде што стотици припадници на Хамас и Исламски џихад се наредија како демонстрација на сила. Палестинска толпа, делумно сместена на урнатините од бомбардирани згради, ја опкружи заложничката, додека маскираните милитанти ја придружуваа низ хаотичната атмосфера.
Израелските одбранбени сили (ЦАХАЛ) соопштија дека сите ослободени заложници се безбедно вратени во Израел.
Ова е трета размена на заложници за палестински затвореници од почетокот на примирјето.
Во рамки на прекинот на огнот, стотици илјади Палестинци се враќаат во своите домови во Газа, но со мешани чувства – радост за враќањето, но и тага за загубените блиски во 15-месечниот конфликт, кој ги разурна северните делови на појасот.
