Жителите на пелагонискиот регион втор ден го блокираа регионалниот пат Прилеп-Крушево, во знак на протест поради најавите дека ќе почне санација на два моста кај селата Славеј и Врбјани.
Незадоволните граѓани стравуваат дека реконструкцијата на мостовите значително ќе им го отежне движењето и ќе мора да користат алтернативни патишта, кои ќе им одземат и повеќе време и повеќе средства.
И градоначалникот на О. Кривогаштани и од Општина Крушево бараат ургентно решение на проблемот. Сметаат дека понудената алтернативна рута не е безбедна и во корист на жителите.
Од Јавното претпријатие за државни патишта пак соопштија дека градежните работи се при крај, и побараа разбирање и трпение од локалното население.
-Градежните работи за ,,Санација на трупот на патот на регионален пат Р 1306, делница Прилеп-Крушево (кај Славеј),,во должина од 920 метри се при крај и најдоцна до 25 мај патниот правец повторно ќе биде ставен во функција. За време на изведбата на градежните работи патниот правец е затворен за сообраќај и согласно со одобрениот времен сообраќаен проект за режим на сообраќај поставена е соодветна сообраќајна сигнализација заради безбедност во сообраќајот.- ЈПДП.
Работите на овој патен правец започнаа во април лани. Неколку месеци имаше застој на работата, поради отежнатите временски услови.
