Десет млади лица ќе учат за пилоти. Агенцијата за цивилно воздухопловство ќе плати половина од парите потребни за нивна обука или 4.200 од потребните 8.400 евра. Десетте избрани кандидати добија решенија, откако беа избрани на огласот на Агенцијата.
Идните пилоти пресреќни дека им се исполнил животниот сон. Марко веќе работи во контрола на летање, а Александар од електроинженер решил да стане пилот.
„Нашите пилоти на Ер тракторите кои што морам да признаам дека ги обожавам. Секој ден зборам со нив и многу се гордеам со тоа што го прават. Многу ги почитувам. И се надевам дека ќе можам наскоро и јас да им помагам. Бидејќи навистина има денови каде што по 12 саати летаат и гасат пожари и мислам дека тие се најхрабрите пилоти бидејќи не можам да замислам нешто пострашно со авион да влезеш во шума во оган каде ништо не се гледа“, вели Марко Колеќески.
„По струка сум електроинженер и решив, уште од мали нозе имам желба да станам пилот. Ова ми е една одлична можност да можам да го започнам својот сон. Мојата иднина ја гледам во капетан на комерцијален авион и се надевам дека ќе може нешто да се постигне за нашата држава да им се повеќе во таа индустрија. Надлежните веруваат дека со ова ќе се ублажи хроничниот недостаток на пилоти во земјава, што најмногу се чувствува во летниот период кога се актуелни пожарите“, вели Александар Чавлески.
„Во Дирекцијата за заштита и спасување имаме три авиони. Во фаза кога се гасат пожари потребно е минимум двајца пилоти на еден воздухоплов, како би имале соодветна замена, а ние имаме сега еден пилот редовно вработен и двајца пензионери кои што се вратени по договор. Значи во моментов таму ни фалат тројца, фалат и во Агенцијата за цивилно воздухопловство, можеби во Министерството за внатрешни работи“, вели Драги Стојаноски.
„Процесот е отворен и транспарентен, тоа го истакнаа сите. Се надевам дека на следниот ќе има уште поголем интерес и уште поголем број на пријавени кандидати и дека истите покрај во условно кажано во државниот сектор, ќе можат да бидат ангажирани и во приватниот сектор“, вели Александар Николоски.
АЦВ ќе распише уште еден оглас со кој ќе се бараат уште 9 кандидати. Најавите се дека може да се одвојат повеќе пари наредната година и да се финансираат и понапредни обуки.
