На седница на 2 септември во Врховниот суд, Комисијата за избор на судија во Европскиот суд за човекови права во Стразбур, ќе донесе одлука за претседател на Комисијата, Деловник за работа на Комисијата затоа што следуваат измени во споредба со претходниот Деловник, како и одлука за објавување на нов оглас за избор на судија во Европскиот суд.
Комисијата е составена од пет члена, претседателот на Врховен суд, првиот човек на Уставен суд, како и претседателите на Основниот граѓански и Кривичен суд и директорката на Академијата за судии и јавни обвинители.
Претседателот на Уставниот суд и член на Комисијата, Дарко Костадиновски за Тв 24 вели дека на денешниот закажан работен состанок на Комисијата во Уставниот суд, претседателот на Врховен не бил во можност да присуствува, па датумот за оглас ќе се знае следната недела кога Комисијата ќе биде во полн состав. Апелира да се пријават што е можно повеќе кандидати.
„На денешниот состанок не бевме во полн состав и затоа не можевме да донесеме одлука, термин за оглас за избор на судија во Европскиот суд. На следната седница, на 2.09. ќе донесеме неколку одлуки, а огласот ќе се објави на почеток на септември. Се работи на измени на Деловникот за работа на Комисијата, допрецизирање на критериумите на огласот. Ќе има и нов рок за пријавување на кандидатите наместо 15 дена, кандидатите ќе имаат рок од 30 дена за пријавување, со надеж дека ќе се пријават повеќе кандидати, кажа Дарко Костадиновски-претседател на Уставен суд.
Првата комисија утврди предлог-листа со тројца кандидати за судија во ЕСЧП, на која се најдоа обвинителката Ленче Ристоска, судијката од Апелацискиот суд Габриела Гајдова и адвокатот Јордан Апостолски. По одлуката на Владата, која не ја прифати листата, Ристоска и Гајдова во јавни изјави побараа одговор-кои критериуми не ги исполниле. Обвинителката Ристовска доплнително рече дека имала и укажувања да ја повлече кандидатурата, но без да открие детали.
На македонскиот судија во ЕСЧП во Стразбур, судијата Јован Илиевски, мандатот му истекува на 1 февруари следната година.
