Некои од најпопуларните брендови на цигари, вклучувајќи ги Родео, Бос, Давидов и Вест, од вчера имаат повисоки цени, односно се продаваат поскапо за 10 денари.
Со почетокот на годинава, во Македонија стапија на сила измените на Законот за акцизите, со кои цигарите постепено ќе се усогласуваат со минималната акцизна стапка на Европската Унија. Ова зголемување ќе ги опфати цигарите, пурите, несогорливите тутунски производи и течноста за електронски цигари, а се предвидува и изедначување на вкупната акциза со пондерираната просечна малопродажна цена во ЕУ.
Трговците очекуваат дека до крајот на неделата и останатите марки ќе поскапат, со цел да се пресретне јануарското зголемување на акцизата и да се придонесат повеќе средства во буџетот.
Законот за акцизите, усвоен во октомври 2023 година, предвидува овие покачувања да се случуваат на 1 јануари секоја година, со што Владата очекува дополнителни 13 милиони евра годишно во државната каса.
