Не е етничко, туку морално и кривично прашање, ДУИ да престане да го брани Дехари, жртвите да добијат заштита. ДУИ се обидува скандалот со Фатмир Дехари да го претвори во етничка приказна. Тоа е евтин маневар. Ова не е Албанци против Македонци. Ова е злоупотребувач против жртви. Ова е прашање на достоинство, закон и одговорност, независно од етничката и верската припадност, реагираат од ВМРО-ДПМНЕ.
Јавноста слушна содржини кои будат сериозен сомнеж за сексуално вознемирување и притисоци во Општина Кичево. Наместо закрила на жртвите и отворање пат за истрага, ДУИ зборува за „подземје“ и „фабрикувани факти“. Тоа е класичен рецепт за одвлекување внимание од суштината и за заплашување на сведоци.
Нашите ставови се јасни:
1. Итна суспензија на Фатмир Дехари од сите јавни функции до завршување на постапките.
2. Независна форензичка проверка на аудио материјалите од вештаци што немаат допир со политиката. Се што е автентично – во обвинителство.
3. Заштита на пријавувачите и потенцијалните жртви согласно законот; отворање дискретни канали за пријава.
4. Внатрешна ревизија во Општина Кичево за работната средина и можни злоупотреби на службена положба.
5. Јавна осуда на секој обид за етничка манипулација. Достоинството на жените не е партиски штит“, се вели во реакцијата на ВМРО-ДПМНЕ.
Оттаму порачуваат дека Кичево не заслужува тишина и релативизација.
Граѓаните се зрели и точно знаат дека клевета се крие зад оние што се плашат од вистината.
Ќе инсистираме институциите да постапат професионално и непристрасно.
Во оваа држава правдата не смее да зависи од партиска книшка, етничка припадност или функција“, реагираат од ВМРО-ДПМНЕ.
