За вакцинација против сезонски грип се пријавени околу 60 илјади граѓани, а досега се вакцинирани над 8 илјади лица, информираат денеска од Министерството за здравство.
Вакцинацијата се спроведува на вкупно 35 вакцинални пункта низ државата, од кои шест се во Скопје.
Сите заинтересирани можат да се пријават преку апликацијата vakcinacija.mk или преку својот матичен лекар.
Со бесплатна вакцинација се опфатени ризичните категории население, како повозрасни лица над 65 години, лица со хронични заболувања, здравствени работници, бремени жени, деца на возраст од шест месеци до пет години, како и лица сместени во старски домови и вработени во овие установи.
Инаку, во организација на Министерството за здравство, превентивни тимови низ државата, започнаа со вакцинација против сезонски грип и во домашни услови, на повозрасни и неподвижни лица, како и на лица со попреченост.
За закажување сезонска вакцинација против грип во домашни услови, граѓаните треба да ги контактираат надлежните во Здравствените домови или болници во градовите каде што живеат.
