Околу 14 часот по локално време, грчките фармери повторно го затворија граничниот премин Евзони за проток на луѓе и возила кон нашата држава. Според информациите на дописничката на МИА од Атина, се очекува блокадата да биде активна до 22 часот.
На грчката страна од границата се распоредени над 300 трактори. Слична блокада беше спроведена и вчера, во текот на претпладневните часови, како и од 18 до 22:30 часот, по што сообраќајот беше нормализиран и се одвиваше тековно до 14 часот.
Низ цела Грција, земјоделците имаат воспоставено вкупно 14 блокади со повеќе од 6.000 трактори, од кои две се на граничните премини Евзони (Богородица) и Ники (Меџитлија).
На Ники, блокадата денес траеше накратко, исто како и вчера, и се однесуваше само на товарни возила, а не и на патнички автомобили.
Вообичаена практика на земјоделците, како и во минатите години за време на нивните протести, е да не ги објавуваат блокадите, бидејќи тракторите и земјоделските возила се позиционирани на преминот и остануваат таму. На секојдневни состаноци, надлежните земјоделски комисии одлучуваат кога и колку долго ќе блокираат.
Граничниот премин Дојран засега останува единствениот каде што нема блокади и движењето на луѓе и возила кон Грција се одвива без пречки.
Земјоделците од Солун денеска се обидоа со тракторите да стигнат до солунскиот аеродром и таму да постават нова блокада, меѓутоа беа спречени од полицијата, по што се случија и инциденти со употреба на солзавец.
Во внатрешноста на Грција, кај месноста Никеа во близина на Лариса има околу 1.800 трактори и затворен е автопатот Солун-Атина. Кај градот Кардица во блокадата учествуваат над 2.000 трактори, а блокада има и на излез од Солун во правец кон Атина.
На повеќе локации каде што се блокадите, земјоделците поставија и новогодишни елки, што во Грција се толкува како порака дека нема да отстапат и доколку е потребно, празниците ќе ги поминат на улица.
Грчките земјоделци ги започнаа протестите во неделата, најавија постепено интензивирање до 5 декември, а засега нема информации до кога ќе траат.
