Премиерот Христијан Мицкоски денеска од собраниската говорница порача дека куповната моќ со сегашната минималната плата во Македонија е повисока од сите земји во соседството, освен Грција. Според него, минималната плата треба да се зголеми, но тоа треба да биде резултат од разговорите меѓу и дијалогот меѓу работниците и работодавачите.
Мицкоски оцени и дека грубо се манипулира со бројки за зголемена минимална плата во соседството зашто таму се зборува за бруто, а кај нас за нето што е голема разлика.
Грција има нешто повисока куповна моќ со минималната плата, а ние имаме повисока од Бугарија, Албанија, БиХ, Црна Гора, Србија, Косово. Од 27-те земји каде е регулирана минималната плата, ние сме за 10 или 11 од нив со повисока куповна моќ. И да, тоа не е доволно, треба повеќе, не велам не, но тоа е резултат на разговорите и дијалогот меѓу работниците и работодавачите. Владата е тука да го фасилитира тој процес. Ние немаме подготвителни состаноци со овие две страни за Економско-социјалниот совет да изгледа како убава политичка парада. Напротив. Имаме жесток дијалог и така ќе продолжиме да функционираме. Ние како Влада можеме да дадеме 250 милиони субвенцинирани кредити на стопанството за во услови на криза да биде стабилно и да креира работни места и тоа го направивме. Можеме со работа да генерираме економски раст во третиот квартал 3,8 отсто реален и 10,2 номинален во однос на нашиот БДП. Прва е Ирска, втора Црна Гора, Данска е трета, а ние со Кипар заедно имаме 3,8, рече Мицкоски, одговорајќи на прашање што му го постави пратеничката Емилија Ангелова од ВМРО-ДПМНЕ.
Како што напомена премиерот, и во однос на минималната плата граѓаните треба да одлучат дали ќе веруваат на политички памфлети или ќе му веруваат на Евростат.
Дали треба повеќе? Да, треба. Ја сум првиот што тоа ќе го поддржи и вели: да, треба. Треба да биде најмногу. Ако гледаме од себични причини, Владата може да побара од Собранието минимнална плата од 700 евра и да профитира, но дали бизнисот и економијата тоа можат да го издржат? Тоа е прашање што работниците и работодавачите треба да го одговорат. Затоа ние велиме, во дијалог да си го одговорите тоа прашање, ние само можеме да помогнеме во тој процес, подвлече Мицкоски.
