Со закон да се овозможи казна за родителот чие дете врши насилство во училиште. Ова ќе го бара министерката за образование Весна Јаневска откако вчера беше избоден ученик од скопската населба Ченто, кој се бори за живот.
Таа појаснува дека агресијата на децата не произлегува од училиштето, туку од дома, а тие агресивни доаѓаат во училиштето со носење ножеви и други опасни предмети во училиштето.
„Ладното оружје децата не го наоѓаат во училиште. Ладното оружје децата го носат од надвор“, вели Јаневска, која потенцира дека со МВР имале успешна акција со кои укажале на штетното дејство на носење несоодветни предмети во училиштата, а беа спроведени и енкој рации, каде МВР претресуваше ранци на ученици пред училишните дворови.
Останува на одлуката да се сменат начините на кои се постапува откако ќе се случат некои несакани настани во училишните клупи, за што ќе се држат и обуки за наставниците, па и за директорите на училиштата, за што бара соработка и со општините, под чија ингеренција се училиштата, како и со Министерството за внатрешни работи.
„Разговорано е со Комората на психолози, постои закон кој вели дека секој психолог треба да е лиценциран. Ќе инсистирам да се лиценцираат и училишните психолози, да направат стручни тимови, оти тоа им е основната работа, да работат со децата, да работат со родителите, да работат и со наставниците на препознавање на тоа што се случува во училиштетои конечно да, ќе ги замолам пратениците да побарат измена и дополнување во Законот за основно, да вметнеме казна за родителот чие дете е сторител на насилие во училиштето. Во моментот разговараме со нив за да се формулира и вметне таа измена во законот“, рече Јаневска, во одговор на новинарско прашање, при денешната презентација на новиот веб-портал на кој се поместени сите предности од учењето во стручно училиште.
