Ребалансот на Буџетот утре ќе се најде на дневен ред на редовната владина седница, најави министерката за финансии Гордана Димитриеска-Кочоска. Според неа, предвидена е нагорна корекција на буџетскиот дефицит, но овојпат поради зголемени потреби за финансирање на капитални инвестиции.
Министерката посочи дека зголемувањето на дефицитот ќе биде насочено кон реализација на инфраструктурни проекти и други капитални расходи, што, како што истакна, е во согласност со законските одредби за управување со јавните финансии.
-Ќе имаме одредена корекција на буџетскиот дефицит нагоре и првпат тоа се случува како резултат на зголемени потреби за капитални инвестиции, а не за тековни трошоци- изјави Димитриеска-Кочоска.
Таа додаде дека покрај расходната страна, ќе има и одредени корекции кај приходите, особено во делот на акцизите, како последица на мерките што Владата ги спроведуваше во изминатиот период за ублажување на ценовните шокови.
Според министерката, дополнителни средства ќе бидат обезбедени за инфраструктурни проекти, активности во Министерството за животна средина, како и за реализација на повеќе ИПА-проекти и програми финансирани со европска поддршка.
-Утре детално ќе информираме колку средства ќе добие секоја институција за капитални расходи- рече таа.
Осврнувајќи се на ефектите од мерките за намалување на ДДВ и акцизите, Димитриеска-Кочоска истакна дека приходите од акцизи ќе треба да бидат коригирани за околу 1,5 милијарди денари.
Сепак, нагласи дека пресметките не се едноставни бидејќи постојат и индиректни ефекти од мерките.
-Во изминатиот период Македонија имаше најниски цени на горивата во регионот, што привлече голем број возила со странски регистарски таблички да точат гориво кај нас. Тоа делумно го ублажи негативниот ефект врз буџетските приходи- објасни министерката.
Таа оцени дека без дополнителната потрошувачка од странски државјани, намалувањето на приходите од акцизи би било уште поголемо, но додаде дека мерките биле неопходни за поддршка на граѓаните и стопанството во услови на високи цени на енергенсите.
