Две години лажни ветувања, економски дебакл, влошување на животниот стандард – нула резултати има ВМРО, нагласи потпретседателката и пратеничка од СДСМ, Јована Тренчевска, во емисијата „Топ тема“, на телевизија Телма. Тренчевска посочи дека Владата на ВМРО за овие две години не направи ништо освен што ги донесе во ситуација на уште поголема сиромаштија работниците, младите, пензионерите, социјално ранливите граѓани.
„Нула во реформи, немаме подобрување на животен стандард, немаме зголемување на минимална плата, немаме мерки за млади, немаме поддршка за земјоделците и кога се зборувате за субвенции – субвенциите ВМРО ги намали за 40 милиони евра за разлика од она што беше до 2024 година. Нула во европскиот пат, зголемена потрошувачка кошничка, македонските работници имаат најниска плата во Европа и тоа се фактите“, рече Тренчевска.
Таа додаде дека за две години сериозно е влошен животниот стандард на граѓаните, додека власта неконтролирано се задолжува.
„Имаме сериозно влошување на животниот стандард, имаме сериозно намалени странски инвестиции од 76,1 процент во 2025 година во однос на 2024 година, зголемен јавен долг за над 2,5 милијарди денари, од 8,5 милијарди е зголемен на 11 милијарди. Имаме инфлација кај храната над 10% на дел од производите и многу повеќе. Имаме синдикална кошничка од скоро 70.000 денари, толку чинат најнеопходните месечни потреби за едно четиричлено семејство, имаме минимална плата од срамни 26.000 денари, имаме игнорирање на ранливите категории, никакви, нула, реформи во делот на социјална заштита. Земјоделскиот сектор ни е во колапс“, рече Тренчевска.
Во дебатата Тренчевска додаде дека власта овие две години ги заборави социјално ранливите граѓани, а од ветувањата за нивна поддршка речиси ништо не е исполнето изминатите две години.
„Нула реформи во делот на социјална заштита, во делот на покачување на правата од детска и социјална заштита – иако ветувањата беа дека на секоја година 10% на гарантирана минимална помош ќе има покачување, 20% на правото на попреченост, 30% на правото на детскиот додаток на деца со попреченост, намалување односно ослободување од данок на личен доход кај мајките кои што родиле прво, второ, трето дете“, рече Тренчевска.
Притоа, Тренчевска додаде дека овие две години Владата на ВМРО докажа дека е расипничка влада, буџетската каса е празна, дефицитот на средина од година е истрошен.
„Буџетски дефицит во буџетот за првите шест месеци изнесува толку колку што е предвиден во текот на целата 2026 година. Ниту економијата расте, ниту пак буџетот може сам да ги сервисира дел од долговите, туку на секој долг ВМРО дополнително зема нов и создава уште поголем долг“, рече Тренчевска.
СДСМ Центар за комуникации со јавноста
