Регулаторната комисија за енергетика анализира проширување на евтината тарифа за струја од сегашните два на четири часа во текот на денот, како и нејзино воведување во сабота, најави претседателот на РКЕ, Ацо Ристов.
Според предлогот, дневната евтина тарифа би можела да важи од 11 до 15 часот, кога производството од фотоволтаичните централи е највисоко, а на берзите често се појавува вишок електрична енергија со многу ниски, па дури и нулти цени.
РКЕ разгледува евтина струја да има и во сабота, покрај постојната ниска тарифа во недела. Во моментов домаќинствата користат евтина струја од 13 до 15 часот и од 22 до 7 часот секој ден, како и непрекинато од сабота во 22 часот до понеделник во 7 часот.
Истовремено се анализира и можноста за промена на ноќната тарифа, бидејќи струјата на берзите е најскапа токму во вечерниот период од 21 до 23 часот. Ристов оценува дека сегашниот тарифен модел повеќе не ги следи реалните пазарни услови и растот на производството од сонце и ветер.
Првичните анализи треба да бидат завршени до крајот на септември, а евентуалниот нов тарифен модел би можел да почне да се применува од 1 јануари 2027 година. Засега не е донесена конечна одлука, а промените ќе зависат од пресметките и консултациите со производителите, снабдувачите и операторите на електроенергетскиот систем.
