Странски државјанин од Романија, кој се изгубил во реонот на Матка, кај пештерата Врело, успешно е пронајден по координирана акција на Центарот за управување со кризи (ЦУК), Министерството за внатрешни работи и останатите надлежни служби.
Во 21:55 часот преку Единствениот повикувачки број за итни случаи 112, во ЦУК бил примен повик од романски државјанин кој при самостојно движење во непристапниот терен кај Матка се изгубил и не можел да го најде патот назад.
По приемот на пријавата, ЦУК веднаш ги известил МВР – ЦИК Скопје, Дирекцијата за заштита и спасување и Црвениот крст на Република Северна Македонија, со цел нивно вклучување во потрагата.
Операторите на ЦУК преку постојана комуникација со изгубеното лице успеале да ја утврдат приближната локација врз основа на координатите и податоците добиени преку повикот на бројот 112. Информациите веднаш биле доставени до МВР за полесно лоцирање на лицето.
Поради ноќните услови, непристапниот терен и опасноста од дополнително губење на ориентацијата, на лицето му било укажано да остане на местото каде што се наоѓа додека трае потрагата.
Екипи од МВР – ЕВР Ѓорче Петров и Полициската станица Сарај, во координација со ЦУК, започнале теренска потрага. Поради тешко пристапниот терен од страната на Матка, спасувачките екипи пристапиле преку Националниот парк Јасен.
Во акцијата се вклучил и директорот на ЦУК, Мухамед Али, кој со теренско возило им помогнал на полициските екипи во потрагата.
По неколкучасовна акција, во 03:45 часот лицето било пронајдено. Било видно исплашено и дезориентирано, но во стабилна здравствена состојба.
По пронаоѓањето, романскиот државјанин бил пренесен во Полициската станица Сарај, каде МВР продолжува со постапување согласно своите надлежности.
