Најмалку 11 луѓе ги загубија животите во разорните пожари што со денови беснеат во Лос Анџелес, додека повеќе од 10.000 објекти се уништени.
На социјалните мрежи со денови кружат зачудувачки фотографии од Малибу, на кои се гледаат изгорени куќи.
Редици блескави куќи, сега претворени во пепел, откако изгореа во страшен пожар. Меѓутоа, на една од фотографиите се гледа како една од вилите стои недопрена, додека сѐ околу неа е изгорено и уништено.
Десетици блокови беа срамнети со земја во луксузната населба Пацифик Палисадес, дом на многу познати личности.
Парис Хилтон, Ентони Хопкинс, Тина Ноулс, Џон Гудман, Кенди Спелинг, Мајло Вентимиља и Мајлс Телер се меѓу оние чии домови беа уништени.
Полициски час е воведен од 18 часот до 6 часот наутро во областите на округот Лос Анџелес каде што жителите се евакуирани поради шумски пожари, бидејќи властите се обидуваат да спречат грабежи во областите погодени од шумски пожари. Полицискиот час ќе трае додека властите во округот не ја укинат наредбата, објави Си-Ен-Ен.
Пристапот до јавни места во зоните за евакуација е забранет, освен за луѓе кои работат на гаснење пожари или бараат медицинска помош.
Секој што ќе го прекрши полицискиот час може да се соочи со парична казна до 1.000 долари или затвор до шест месеци.
Најмалку 20 лица се уапсени во округот за грабежи за време на шумските пожари, изјави вчера на прес-конференција, супервизорот на округот Лос Анџелес, Кетрин Баргер. Гувернерот на Калифорнија Гевин Њусом изјави дека нема да се толерира грабеж во областа на Лос Анџелес, каде беснеат пожари и каде што се евакуирани голем број домови.
Њусом нареди распоредување на Националната гарда на Калифорнија за да им помогне на спроведувањето на законот, објави Си-Ен-Ен.
Стотици членови на Националната гарда ќе бидат распоредени за да го зајакнат капацитетот на локалните сили за спроведување на законот и ќе бидат стационирани на сообраќајните контролни пунктови за да се гарантира безбедноста, се вели во соопштението на канцеларијата на Њусом.
Нагласено е дека со распоредувањето на Националната гарда ќе се зголеми бројот на безбедносните сили на теренот на 8.000, вклучително и пожарникари.
🇺🇸🔥🔥🔥 Se quemaron viviendas frente al mar en Malibú… las propiedades más caras y exclusivas. pic.twitter.com/jwsADwco7L
— 𝔻𝕖𝕤𝕕𝕖 𝕃𝕒𝕤 𝕋𝕣𝕚𝕟𝕔𝕙𝕖𝕣𝕒𝕤 (@DOGDEGA) January 9, 2025
