Системот „Сејф сити“ успешно ги регистрира сообраќајните прекршоци на патиштата, но засега не е во можност да ги санкционира возачите на возила со странски регистарски таблички, поради недостиг на интегрирана база на податоци за утврдување на сопственоста и доставување на прекршочни налози.
Од Министерството за внатрешни работи информираат дека системот ги евидентира сите возила без исклучок, но за странските регистарски таблички моментално нема пристап до потребните информации за идентификација на сопствениците преку меѓународни бази.
Министерот Панче Тошковски најави дека се работи на изработка на софтверско решение, како и на воспоставување посебен организациски пункт кој ќе биде задолжен за процесуирање на прекршоците направени од возачи со странски таблички.
Во екот на летната туристичка сезона, низ државата секојдневно транзитираат десетици илјади странски државјани. Според податоците, само во последното деноноќие преку граничните премини Богородица и Табановце влегле околу 24.000 странски државјани, додека повеќе од 32.000 ја напуштиле државата.
Министерот за внатрешни работи Панче Тошковски вчера даде отчет за сработеното во изминатите две години, при што се презентираат резултатите од работењето на министерството и ефектите од спроведените мерки во областа на безбедноста и сообраќајот.
Тој соопшти дека од почетокот на системот „Безбеден град“ на 02.02.2026 година, во првите пет месеци е забележано намалување на бројот на загинати во сообраќајни незгоди за околу 40 проценти, односно 34 загинати лица, наспроти 55 во истиот период претходната година.
До 22 јуни преку системот се регистрирани над 120.000 сообраќајни прекршоци, од кои над 95 проценти се однесуваат на пречекорување на дозволената брзина на движење.
