Инвеститор за 2,5 милиони евра го купи земјиштето на ски-центарот „Кожуф“, кој е девет години во стечај.
На 10 април Основен суд Велес донел решение со кое Собранието на доверители ја прифатило понудата на „Елдорадо Инвест Тим“, стои во информација објавена на Централен регистар, објави „Фактор“
Купено е земјиште со површина од 451.810 метри квадратни, за сума од 157 милиони денари без ДДВ преку јавен оглас за електронска продажба на имот без утврдена почетна цена од февруари годинава.
Неофицијално, станува збор за инвеститор со македонско потекло од гевгелиско-виничкиот крај кој долги години живее во Германија.
Неговата инвестиција во ски-центарот би ја здружил во заеднички конзорциум со инвеститорот кој пред две години ја купи опремата од ски центарот кој има голем потенцијал.
„Елтех“ Дооел Скопје е фирмата која за 21,5 милиони денари (350.000 евра), го купи движниот имот, односно опремата на ски-центарот Кожуф во стечајна постапка, иако истиот според официјалните проценки вредел 174 милиони денари, или осум пати повеќе.
Купени се ски-лифтовите, жичарницата и механизацијата.
Со рестартирањето на опремата и со купување на недвижниот имот се исполнети условите за рестартирање на центарот, но за тоа, како што велат упатените, е потребно и да се направи разрушениот пат од страна на државата.
