Според специјализираниот портал „Екс ју авијација“, „Кроација ерлајнс“ продолжува со намалување на бројот на летови на маршрутите од Загреб кон Скопје и Сараево, како дел од пошироките мерки за рационализација на мрежата поради зголемените трошоци во авиоиндустријата.
Во текот на јуни, авиокомпанијата ќе реализира во просек по седум летови неделно на линијата Загреб – Скопје, што претставува намалување во однос на минатогодишните девет летови неделно во истиот период. Истовремено, на маршрутата кон Сараево ќе има меѓу девет и десет летови неделно, додека лани бројката изнесувала единаесет. Од порталот наведуваат дека намалувањата започнале уште во текот на зимската сезона, а веќе се планирани и дополнителни кратења за претстојниот зимски распоред на летање.
Според анализите на порталот, превозникот се соочува со сериозни финансиски предизвици, пред сè поради ненадејното зголемување на цените на млазното гориво, што влијаеше врз оперативните трошоци на авиокомпаниите низ Европа и светот. Поради тоа, „Кроација ерлајнс“ во следниот квартал ќе откаже околу 900 летови на повеќе дестинации, со цел да ги намали загубите и да ја оптимизира искористеноста на флотата.
Дополнителен удар за воздушното поврзување на Скопје претставува и најавеното повлекување на „Луфтханза“ од линијата Франкфурт –Скопје. Од 1 јуни, компанијата престанува со директните летови меѓу двата града, по повеќе од три години присуство на македонскиот пазар. Наместо тоа, на патниците ќе им бидат понудени алтернативни конекции преку Виена, преку подружницата „Аустрија ерлајнс“.
Во меѓувреме, македонските власти најавуваат нови обиди за проширување на авиомрежата. Вицепремиерот и министер за транспорт, Александар Николоски, изјави дека во следниот период ќе бидат воведени пет нови авиолинии.
Според најавите, „Аустрија ерлајнс“ ќе воспостави директна линија Виена – Охрид, додека во јуни треба да стартуваат и летови од Краков и Вроцлав во Полска кон Охрид. Дополнително, ќе бидат отворени и сезонски линии од Палермо на Сицилија и Алгеро на Сардинија кон скопскиот аеродром.
Николоски истакна дека овие нови линии се отвораат во период кога светската авиоиндустрија се соочува со една од најголемите кризи досега. Тој додаде дека, по неуспешните преговори со „Рајанер“, Владата продолжува разговори со други заинтересирани авиокомпании за воведување нови дестинации од македонските аеродроми.
