Мажот на 8 мај беше уапсен во италијанскиот град Пјаченца под сомнение дека ја убил својата сопруга, се наоѓа во притвор и во наредните денови ќе биде испрашуван од истражителите.
Станува збор за 59-годишниот Хако Витанов, по потекло од Македонија, кој бил приведен во близина на гробиштата каде е погребан неговиот син Методиј, загинат во сообраќајна несреќа во 2020 година. Според италијанските медиуми, непосредно пред апсењето Витанов се обидел да си нанесе повреди со нож на зглобовите, најверојатно во обид за самоубиство. По укажаната лекарска помош, бил однесен во полициската станица на улицата „Виале Беверора“, а неговиот автомобил, со кој побегнал по убиството, е запленет.
Трагедијата се случила во станот на улицата „Виа Пасторе“, каде што семејството живеело со своите деца. Во моментот на нападот, двете помали деца не биле дома, туку престојувале кај свој чичко, додека третото дете веќе извесен период живее одвоено. Според досегашната реконструкција на настанот, Ацо Витанов со нож ја нападнал сопругата Милена Витанова и ѝ нанел смртоносни повреди. По нападот, наводно го фрлил ножот и ги повикал карабињерите.
Мотивот за злосторството засега не е познат. Соседите и познаниците за семејството велат дека биле тивки и мирни луѓе, без видливи проблеми, но дека тешко ја поднеле смртта на нивниот син пред пет години.
