Спроведувањето на реформите на една Влада не е прашање на субјективна перцепција, туку на мерливи резултати, оценува македонскиот министер за надворешна политика и надворешна трговија Тимчо Муцунски, по критиките во јавноста откако беше објавено интервјуто на известувачот за Македонија во Европскиот парламент, Томас Вајц за бугарската редакција на „Еуроњуз“, во кое тој вели дека последната година Македонија нема никаков напредок.
„Најдобар судија е времето, а времето ќе покаже кој ќе биде во право“, изјави Муцунски во интервју на ТВ Сител.
Според Муцунски, ако државата не спровела никакви реформи, тогаш нема да добиела средства од фондот од Планот за раст. Тој вели дека во периодот до последниот извештаен период поврзан со реформската агенда, Македонија има добиено 75 милиони евра.
„Ако не сме спроведувале реформи, немало да сме ги добиеле тие средства. Има три држави во регонот – Србија, БиХ и Косово, коишто ништо немаат добиено од планот за раст, бидејќи не спроведувале реформи. Очекувам за последниот извештаен период, кој ќе се објави деновиве или во период од една недела, да имаме многу висока оценка во спроведени реформи и да добиеме во една транша околу 70 милиони евра – тоа е наше очекување, ќе видиме колку ќе се материјализира. И да бидеме земја од западниот Балкан којашто највеќе добила во тој момент преку една транша, бидејќи посветено работиме на реформите“, рече Муцунски.
