Владата и министерството за транспорт преземаат активности за да се превенираат трагедии. Вицепремиерот Александар Николоски изрази сочувство на фамилиите кои изгубија некој во трагедијата во Кочани.
Тој рече дека моментално се врши проверка на сите издадени лиценци и овластувања.
„Владата презема мерка, а препорачува и на општините истото да го направат – контрола на сите издадени лиценци, овластувања и се она што значи пренесување на надлежности од државата кон приватни субјекти. Во суштина, тоа е идејата на овие лиценци и овластувања за одредени работи кои државата не може да ги врши да ги врши приватниот сектор во име на државата. Идејата е добра, благородна е, ја прават сите најразвиени европски држави, но проблемот настанува кога не се почитуваат прописите и правилата“, рече Николоски.
Николоски додаде дека наскоро јавноста ќе добие бројки од целата акција која ја презема владата.
„Имаме една сериозна акција на проверка. Се работи во сите сектори и сите тие ќе почнат да излегуваат со бројки и резултати со кои би презентирале пред јавноста каква е состојбата. Увидуваме и дека има доста законски недоследности. Не велам дека законите се секаде лоши. Во најголем дел законите се добри и намерата е добра, но за жал нашиот менталитет е таков каков што е и има бројни злоупотреби. Во одредени ситуации законодавецот веројатно сакајќи да ги поедностави процедурите, тоа поедноставување доведува до големи злоупотреби од страна на приватните субјекти кои се крајни корисници на овие овластувања и лиценци“, заклучи вицепремиерот Николоски.
Денес имам нови бројки имајќи предвид дека вработените во министерството за транспорт работат и денес и утре. Доколку строго ги гледаме законите на раб на закон е дали смееме да го правиме ова. Ние донесовме одлука да ја направиме оваа контрола. Пред да одам со бројки да најавам дека по итна постапка ќе пуштиме законски измени со што овие контроли ќе станат облигаторни на секои шест месеци да се прават“, рече Николоски.
Тој ги објави новите бројки и рече дека најголем дел се од Б категорија.
„Имам нови бројки. Вкупниот број на издадени лиценци во делот на градба, проектирање, надзор, изработка на детални урбанистички планови е некаде над 3000 лиценци. Скоро сите се прегледани. До денес прегледавме 2810 лиценци, а бројката на одземени лиценци е 427. Тие се однесуваат во делот на градба, надзор, проектирање, изработка на детални урбанистички планови. Најголемата е бројката на изведувачи на градба во Б категорија, тоа е практично се што не е врвен државен објект, меѓу што и станбени згради. Таму ќе се одземат 198 лиценци. Во понеделник таа работа ќе биде завршена, а во вторник ќе имаме конкретни бројки и со име ќе ги извадиме сите носители на лиценци на сите носители на кои ќе им бидат одземени лиценците. За истото ќе го известиме надлежното обвинителство и МВР“, заклучи Николоски.
