Потпретседателот на ДУИ, Бујар Османи, на денешната прес-конференција упати остри критики кон коалицијата ВЛЕН, оценувајќи дека по две години учество во Владата не успеала да ги исполни ветувањата поврзани со европските интеграции и, како што рече, го претворила европскиот глас на Албанците во „ништо“.
Во рамки на серијалот „Две години понижување – ВЛЕН ништо“, Османи посочи дека најголемиот неуспех на ВЛЕН е токму застојот во евроинтегративниот процес.
Според него, ВЛЕН пред граѓаните ветила дека ќе донесе нова енергија, нова динамика и нов кредибилитет во Брисел, како и дека ќе го забрза патот на државата кон Европската Унија во првите шест месеци од владеењето.
„Две години подоцна, резултатите се разочарувачки. Државата нема направено ниту еден суштински чекор кон Европската Унија. Наместо забрзување – имаме стагнација, наместо реформи – импровизации, а наместо европска агенда – дневна политика“, изјави Османи.
Тој оцени дека државата не ја искористила во целост ниту можноста што ја нуди Планот за раст на Европската Унија и додаде дека, наместо да биде лидер во регионот во спроведувањето на реформите, денес се соочува со доцнења и недоволна реализација.
Османи се повика и на последниот извештај на Европскиот парламент, во кој, според него, се бара обновена политичка посветеност за продолжување на европскиот пат, целосно спроведување на Охридскиот рамковен договор и обезбедување на јазичната еднаквост.
„Кога Европскиот парламент е принуден да ги потсетува институциите да ги почитуваат веќе стекнатите права на Албанците, тогаш тоа е најсилниот доказ за неуспехот на ВЛЕН како политички претставник во Владата“, рече Османи.
Тој додаде дека европскиот глас на Албанците во Владата е сведен на „едно големо ништо“ и порача дека граѓаните ќе ја дадат својата оценка на следните избори.
