Бројот на невработени во Германија во август се искачи за 46.000 на 3,025 милиони, објави денеска (29.08) Сојузната агенција за вработување. Последен пат бројка од над три милиони (3,017 милиони) невработени имаше во февруари 2015 година. Стапката на невработеност моментално се зголеми за 0,1 проценти на 6,4%. „Поради летниот распуст, невработеноста се искачи на над три милиони“, објаснува раководителката на Агенцијата за вработување, Андреа Налес. Поради летните одмори, многу компании ги одложуваат новите вработувања за крајот на летото, објави Дојче Веле.
Пазарот на труд и натаму е погоден од економскиот пад во последните години, нагласува Налес: „Сè уште сме во средината на дното. Сè уште не сме излезени оттаму“.
Сепак, постојат и почетни знаци на стабилизација, „иако суптилни“. Работењето со скратено работно време останува на зголемено ниво, но постојано се намалува по малку од почетокот на годината. Се очекува вообичаеното есенско закрепнување да започне во септември и да доведе до намалување на невработеноста, вели Налес. Но, без засилен конјунктурен ветер, може да се случи „во зима повторно да ја надминеме границата од три милиони“.
Налес зборува за поделен пазар на труд. Додека сектори како здравство, нега и јавни услуги вработуваат, ситуацијата во производството е потешка: „Таму слабееме“, оценува Налес.
Позитивно изненадување беше тоа што бројот на невработени, прилагоден за сезонските флуктуации, беше за 9.000 помал во август отколку во јули. Аналитичарите очекуваа зголемување од 10.000. Сепак, во споредба со истиот месец минатата година, бројот на луѓе без работа во август е поголем за 153.000.
Канцеларот Фридрих Мерц нагласува дека зголемувањето на невработеноста не е неочекувано. „Сепак, бројката покажува колку се неопходни реформите за поголем раст и вработување“, објасни Мерц на маргините на денешната германско-француска министерска средба во Франција.
По две последователни години рецесија, економијата сè уште не е опоравена – оваа пролет брутодомашниот производ се намали за 0,3 проценти. Во криза е особено индустријата. Компаниите стенкаат под товарот на високите трошоци за енергија, додека истовремено агресивната царинска политика на американскиот претседател Доналд Трамп ѝ штети на надворешната трговија.
