На денешната собраниска седница посветена на интерпелацијата на министерот за внатрешни работи Панче Тошковски, пратеникот на СДСМ Миле Талески упати остри критики за работењето на Министерството за внатрешни работи, оценувајќи дека по бројните скандали, безбедносни пропусти и трагедии во изминатите две години, министерот одамна требало да ја напушти функцијата.
„Да имаше право и правна држава, да имаше Закон кој што важи за ВМРО, Панче Тошковски одамна ќе беше сменет. А да имаше морал, Панче Тошковски денес не требаше да биде предмет на интерпелација“, рече Талески.
Во своето обраќање, тој потсети на изјавата на Тошковски дека секој ќе одговара пред законот, оценувајќи дека реалноста покажала поинаква слика.
„Се сеќавате ли на големите зборови на Панче Тошковски? ‘Брат да ми е, ќе одговара.’ Еве поминаа две години. Кој одговараше? Никој. Никој не одговара“, истакна Талески.
Пратеникот на СДСМ нагласи дека во периодот додека Тошковски е министер се случиле бројни безбедносни инциденти и скандали, без да биде утврдена одговорност.
„После сите скандали, после сите пропусти, после сите убиства, трагедии, безбедносни инциденти, после пет тони дрога што поминаа преку македонската граница, после распадот на безбедносниот систем – Панче Тошковски требаше сам да си поднесе оставка“, рече Талески.
Осврнувајќи се на случајот со петте тони дрога кои поминале преку македонската граница, тој побара одговори од министерот.
„Пет тони дрога поминаа преку граница. Не пет килограми, не педесет килограми, пет тони. Шест месеци подоцна нема одговорност. Нема разрешувања. Нема оставки. Нема виновници“, рече Талески.
Според него, интерпелацијата не се однесува само на работата на еден министер, туку и на состојбите во целиот безбедносен систем.
„Денес не расправаме само за еден министер. Денес расправаме за целосен распад на безбедносниот систем. За партизирана полиција. За неказнивост. За заштита на партиски кадри. За држава во која граѓаните се оставени сами на себе“, порача Талески.
На крајот од своето обраќање, тој директно го повика министерот Тошковски да поднесе оставка.
„После две и пол години мора малку чувство да проработи. Пустош направивте. Дајте си оставка и ослободете го МВР од сите овие скандали“, порача Талески.
