Започнуваат едукациите за професорите, кои од вториот семестар во секој наставен предмет ќе ја имплементираат и ќе ги обучуваат учениците за вештачката интелигенција.
Во моментов ќе се едуцира репрезентативен примерок на професори од едно училиште, по што овие професори понатаму ќе треба да ја прошират мрежата за едуцирање на професорите, објави денес министерката за образование и наука, Весна Јаневска од Општина Кисела Вода, каде што одговараше на прашања, за тоа како ќе се применува вештачката интелигенција и како ќе се едуцираат учениците.
“Ќе ја воведуваме во сите предмети и ќе зависи од наставникот, колку и какви алатки ќе користи, дури и таму, ако се сеќавате, се зборуваше деновиве е предвидена за индивидуална настава на учениците и верувам дека наставниците ќе почнат, така да ја користат.”
Но, претходно образувајќи ги учениците, кои се предностите, кои се негативностите од вештачката интелигенција. “Значи откако ќе се спроведат базичните информации и учениците ќе стекнат базични знаења ќе продолжиме, со постепено воведување на вештачката интелигенција во сите предмети”, изјави Јаневска.
Таа потенцираше дека, сепак, од професорот ќе зависи и треба да процени како и со кои ученици ќе работи. “Затоа јас постојано велам наставникот има клучна улога во образовниот систем. Тој мора да биде почитуван. Наставникот мора да го добие своето вистинско место во општеството, за да можеме да спроведуваме соодветен образовен процес”, изјави Јаневска.
Таа надополни дека вештачката интелигенција веќе се користи од страна на учениците и како што рече “би рекла неконтролирано”. “Би сакала да им порачам на родителите дека овој процес ќе биде строго контролиран и благодарам на професорите од Факултетот за информатика на УГД, кои направија прекрасен прирачник, во кој се опишани и предностите, но и предизвиците со коишто би можеле да се соочат наставниците и учениците. Секако многу од тој прирачник, кога станува збор за учениците е посветено и на етичкиот момент. Значи дали ќе го користат неправилно овој систем или правилно овој систем”, рече Јаневска.
Министерката за образование и наука, Јаневска подвлече дека учениците ќе учат и за безбедност за зачувување на лични податоци и сите други несакани дејствија.
“Обуките моментално почнуваат и мислам дека јас вчера кажав објавен е повикот на Бреинстер за обуки на наставниците. Но, почнуваат и други обуки не само преку Бреинстер. Нема да воведеме и не можеме да ја воведеме нагло, бидејќи ова е почеток. Но, ќе ја воведуваме постепено во сите училишта низ сите предмети и во училишната администрација”, рече Јаневска.
