Од први јули на позитивната листа на лекови се ставени три нови лекови против згрутчување на крвта, т.н. антикоагулантни лекови, најави денеска директорот на Фондот за здравствено осигурување Сашо Клековски,
Станува збор за „еноксапарин“, „надопарин“, и „рибароксабан“.
„За ‘еноксапаринот’ се достапни два бренда, кај ‘надопаринот’ е достапен еден бренд и кај ‘ривароксабанот’ во почетниот период ќе биде достапен еден бренд. Што ќе значи ова? Првите два антикоагулантни лекови беа достапни со рефундација. Отсега понатаму ќе бидат достапни на позитивна листа со рецепт од специјалист. Овие два антикоагуланти се во рангот од 1.100 до 2.700 денари, ценовен ранг во зависност од дозажата и големината на терапијата, сега ќе бидат достапни за партиципација со 160 до 240 денари и еден од брендовите ќе биде достапен без доплата“, рече Клековски.
Клековски кажа дека со овие одлуки, граѓаните ќе заштедат значителна сума на пари
„Третиот антикоагулант, ‘ривароксабинот’, е за првпат на позитивна листа. Тој досега се движеше во рангот од 2.000 до 2.200 денари. Сега ќе биде достапен за партиципација од 160 денари. Во почетниот период ќе има доплата од 105 до 505 денари во зависност од дозажата и бројот на таблети. Во најчесто користената дозажа, тоа се 10 милиграма по 30 таблети, заштедата на граѓаните ќе биде 1.752 денари. Од 1 јануари 2027 овај лек ќе биде достапен без доплата, само со партиципација“, кажа Клековски на прес-конференција во Владата.
Директорот на Фондот додаде дека поради инертноста на аптеките, од 1 до 15 јули ќе прифаќаат рефундации за антикоагулансите.
