Разговаравме отворено како што доликува на партнери кои се стремат кон заедничка иднина. Разговаравме за патот кон ЕУ, пат кој не беше ни лесен ни краток ниту секогаш праведен.
Ова го истакна премиерот Христијан Мицкоски по денешната средба со високата претставничка на ЕУ за надворешни работи и безбедносна политика, Каја Калас.
Пат со многу предизвици, компромиси и за жал предолго чекање. Нашата определба останува јасна, ние припаѓаме во ЕУ. Не затоа што некој ни го должи тоа туку затоа што со децении градиме општество на демократски вредности, владеење на право, човекови права и добрососедство. Затоа што ние вложуваме, се жртвуваме и се менуваме со надеж дека трудот ќе биде препознаен. Меѓутоа таа определба мора да биде возвратена. Оваа држава има право да очекува многу појасна, поотворена и почесна потврда од самата Унија. Затоа што, ќе се согласиме, не сите земји членки и не секогаш се однесуваат во европскиот дух – порача Мицкоски.
