Министерот за внатрешни работи Панче Тошковски денеска во просториите на Министерството ја прими донацијата од Сојузната Република Германија, вредна околу 600.000 евра.
– Во Министерството за внатрешни работи денеска ја примивме вредната донација од Сојузна Република Германија, во присуство на амбасадорката Петра Дрекслер, со што уште еднаш се потврди силното партнерство и меѓусебната доверба меѓу нашите две земји. Станува збор за опрема во вредност од околу 600.000 евра – моторни и специјални возила, термовизиски камери, компјутери и софтвери, уреди за проверка на документи, која директно ќе придонесе за поефикасна заштита на границите, поуспешна борба против организираниот криминал, трговијата со луѓе и криумчарењето мигранти, како и за унапредување на форензичките капацитети – соопшти Тошковски преку социјалните мрежи.
Министерот нагласи дека значењето на оваа поддршка не се огледува само во опремата, туку и во пораката што ја носи – дека Германија стои рамо до рамо со Македонија во обезбедувањето сигурност и стабилност за граѓаните.
– Преку заедничките обуки и размената на искуства градиме модерна, професионална и европска полиција. Искрена благодарност до Сојузната полиција на Германија и до Амбасадата на Германија за континуираната поддршка. Продолжуваме заедно да ја јакнеме безбедноста и институциите на нашата држава, – посочува Тошковски.
